യാത്ര

 ഒരു വാക്കു ചൊല്ലുവാനായി നാമിന്നെത്ര പറയാത്ത വാക്കിന്റെ ദൂരം കടക്കണം അതിനിന്നൊരായിരം ചിന്തകള്‍ കത്തിച്ചു കനലാക്കി നോവിന്റെ നീറ്റം കുടിക്കണം പലപാടു ചൊല്ലുവാനാശിച്ച സ്വപ്നങ്ങള്‍ മിഴിനീരു ചാലിച്ചു മൌനം ഭുജിക്കണം ഇനിയാര്‍ക്കു വേണ്ടിയാണീ ജന്മമെന്നോര്‍ത്തു കടുകായ്പിനാഴങ്ങള്‍ നീന്തി തുടിക്കണം അതിഗൂഢമാകും മനസ്സിന്റെ തന്ത്രിയില്‍ കനിയാത്ത രാഗത്തിനീണം തിരക്കണം കഠിനാനുരാഗം കറുപ്പിച്ച കാഴ്ചയില്‍ ചുടു ദീര്‍ഘശ്വാസങ്ങളാട്ടിത്തെളിക്കണം കരളിന്റെയുള്ളിലെ കാണാത്ത നോവുകള്‍ കവിതയ്ക്കു കാഴ്ചവെട്ടങ്ങളായ് തീര്‍ക്കണം ഒരു വാക്കു മിണ്ടാതെയൊരു ദീര്‍ഘയാത്രയ്ക്കു വഴിയോര്‍ത്തു കാറ്റിന്റെയീണം പിടിക്കണം ഇനിയെന്നു കാണുമെന്നറിയാതെ, നിന്നിലായ് നിറയുന്ന മൌനവാല്മീകങ്ങള്‍ പൂകണം ഒരു യാത്ര, നിന്നിലെ പ്രണയാര്‍ദ്ര ചിത്തത്തെ കനവാക്കി ജീവന്റെ കാലം കഴിക്കണം.