ഗൂഗ്ളി

ഗാലറിയിൽ ഇരിക്കുമ്പോള്‍
എല്ലാവരും കാണികളാണ്, 
പാഞ്ഞുവരുന്ന പന്തുകളിൽ
ചിലതെല്ലാം അതിരുകളും കടന്ന്
പറന്നു പോകും
ഉന്നം പിഴക്കാതെ ഒരെണ്ണം ഗാലറികളെ നിശ്ശബ്ദമാക്കും,
കൊടികൾ താഴും
വാദ്യഘോഷങ്ങൾ മാഞ്ഞു പോവും 
കാണികൾക്കിടയിൽ പഴയൊരു ബാറ്റ്സ്മാൻ
ഉന്നം തെറ്റാതെ വന്ന ഓർമ്മകളെ
തുപ്പലു തൊട്ട് തുടച്ചുമിനുക്കും. 
ഇതെന്തൊരു കളി 
ഇവിടെ പഴയൊരു കളിക്കാരൻ ഉണ്ടായിരുന്നു, 
ഒരാൾ മുന്നിലിരുന്ന് കൂട്ടുകാരോട് കഥ പറയുന്നു, 
ആ കളിക്കാരൻ ഞാനാണ് ഞാനാണ്
ഉറക്കെ പറയാന്‍ തോന്നും. 
വേണ്ട, തിരിച്ചറിയാതെ പോയൊരു ഗൂഗ്ളി, 
വീണുപോയൊരു വിക്കറ്റ്, 
ഒരൊറ്റ ബോൾ! 
എന്നാലും പണ്ടിവിടെ.....