ബോധിസത്വൻ

വലതുകാലിൽ അപ്പിടി നീരാണ്
തീരേ നടക്കാന്‍ വയ്യ
വല്ലാത്ത വേദന
നിൽക്കുന്തോറും നീരുകൂടി
ഷൂ ഇറുകി ഇറുകി
അതീക്കൂടെ എല്ലുകുത്തുന്ന വേദനയും,
വലതുകാലിലെ നീര് ഒന്ന്
ഇടതുകാലിലാക്കിത്തന്നാൽ നന്നായിരുന്നു
പ്രാർത്ഥന ഒരു പരാജയമാണ്,
പ്രാന്തില്ലല്ലോ! 
ഏന്തി വലിഞ്ഞു നടക്കുമ്പോൾ
മനസ്സിൽ നിറയെ മുഖങ്ങളാണ്, 
എല്ലാ ഇഷ്ടങ്ങളും വേദനയാണ്.
എങ്കിലും
ഇന്ന് നിശ്ശബ്ദനാവാനറിയാം
അമർത്തിപ്പിടിക്കാനറിയാം
കടിച്ചിറക്കാനറിയാം
ഇരുട്ടിന്റെ പാതാളങ്ങളിൽ
എക്സറേ മെഷീനിൽ എന്നപോലെ
നിവർന്നു കിടക്കാനറിയാം 
ഇതിനപ്പുറം ഒരു സ്കൂളിന് 
എന്തു തരാൻ സാധിക്കും!