നിങ്ങളിൽ ഒരാൾ

ഇല്ല, ഞാനില്ല

ജീവിതത്തിന്റെയീ
തെല്ലിൽ കണ്ണിമ
പൂട്ടി നില്ക്കുന്നു ഞാൻ.
 
എന്തു കാണ്മൂ , ഇരുട്ടു വെട്ടത്തിലായ്
കല്ലുരുട്ടിക്കളിക്കുന്നു കുട്ടികൾ.
ഒന്നൊരല്പമിടമെനിക്കും കൂടി
നിങ്ങളിൽ ഒരാളാവട്ടെയെന്നു ഞാൻ.
കണ്ണു പായുന്നു, കല്ലു വന്നെന്റെ
നെഞ്ചിലെക്കൂടു ചിന്നിച്ചിതറുന്നു.
പൂക്കൾ
പൂമ്പാറ്റ
പുള്ളിപ്പറവകൾ
ചോറ്റുപാത്രത്തിൽ
ചോണനുറുമ്പുകൾ
ഒക്കെ വീണുടഞ്ഞെങ്കിലും പൂട്ടിയ
കണ്ണുവെട്ടം തുറക്കുകയില്ല ഞാൻ.
 
എന്തു ദുഃഖം!
 
ഇരുളിന്റെ താഴുകൾ
തള്ളി നീക്കിത്തുറക്കുന്ന നാളെയിൽ
നിങ്ങളിൽ ഒരാൾ
ഞാനെന്നുറക്കെയാർ ചൊല്ലുമത്ര-
യുറക്കെ ഞാനും വരും.

ഇരുത്തം

 

പ്രണയം

 

മഴ

മഴ ചാർത്തുന്നുണ്ട്

ചിന്തയുടെ കാഷായ വസ്ത്രം

ഓർമ്മയുടെ ജപമാല

നഗ്നമായ മനസ്സിനു

സഹനത്തിന്റെ കുളിർമ്മ.

വിശുദ്ധിയുടെ വെള്ളയാടകളിൽ

മഴക്കാറിന്റെ മൌനം,

വെള്ളിവാളിന്റെ വേദന,

ഇടിമുഴക്കത്തിന്റെ രോദനം;

പെയ്തിറങ്ങിപ്പോയ ദുഃഖം

ത്യാഗത്തിന്റെ പ്രതിഫലം.

ഒരു ഓണക്കവിത

ഇന്നു രാവേതു പൂവിൻ നറുമണം

വെണ്ണിലാവിന്നു ചാലിച്ചു  ലാലസം

മെല്ലെ മൂളിപ്പറന്നു വന്നെത്തുന്ന

കുഞ്ഞു കാറ്റൊന്നു ചൂടുന്നു സൌരഭം.

ഇന്നു പാരിൻ കിളിമരച്ചില്ലയിൽ

തെന്നലാടിക്കളിക്കുന്ന ജാലകം

ഉള്ളു തുള്ളിത്തുളുമ്പുന്നൊരോർമ്മകൾ

പൊന്നുപൂവിട്ടൊരുക്കുന്നു മാനസം.

ഇന്നു കാലം കൊഴിച്ചിട്ട പൂക്കളിൽ

കണ്ണനുണ്ണിക്കിടാവിന്നു പൂക്കളം

കണ്ടുവോണം കിനാവെങ്കിലും ഹാ..

കണ്ണു ചിമ്മിച്ചിരിക്കുന്നു താരകം.

ഇലപൊഴിയും കാലം

വനതലങ്ങളിൽ ഇലപൊഴിയുന്നു

സ്മൃതികൾ വേനലിൻ വറുതി കായുന്നു

പിടയുമാർദ്രമാം ഹരിതകാന്തിയിൽ

ശലഭ ഭംഗിതൻ ചിറകു ചായുന്നു.

ഉടലിൽ ആഴമാം മുറിവിലാരെയോ

പരതി ലോലമായ് വിരലു പായുന്നു.

കരളിൽ വറ്റിയോരരുവിയിൽ മുഖം

തിരയുമാലിലക്കുരുവി പാടുന്നു,…..

ചൊടിയിൽ വാക്കുതൻ മറവി തേടിയീ

വനപഥങ്ങളിൽ ഇലകൾ മൂടുന്നു.

വിമാനം

നീ വിമാനത്തിൽ കയറിയിട്ടുണ്ടോ?
ഞാൻ ആദ്യമായി കയറിയ ഓർമ്മ
എന്റെ കണ്മുന്നിലിന്നും ഉണ്ട്
എന്തൊരു ആവേശവും സന്തോഷവും
ആയിരുന്നു അന്ന്.
നീ വിശ്വസിക്കുമോ ആവോ
ഞാൻ അന്നു മേഘങ്ങളെ കോരിയെടുത്തു
നക്ഷത്രങ്ങളെ ചുംബിച്ചു
അന്നു ഞാൻ ആകാശത്തിലൂടെ
പറന്നു.

നീ വിമാനത്തിൽ കയറിയിട്ടില്ലല്ലോ, ഭാഗ്യം.
എനിക്കിപ്പോൾ അതൊരു ഭയമാണ്.
എന്റെ ശവവും കൊണ്ടുപോവുന്ന ഒരു വിമാനം
ഞാൻ സ്വപ്നം കണ്ടു,
ഞാൻ മേഘങ്ങളെ കണ്ടില്ല,
നക്ഷത്രങ്ങളെ കണ്ടില്ല,
ഒന്നും കണ്ടില്ല…അറിഞ്ഞില്ല…
എനിക്കിപ്പോൾ പറക്കാൻ കൊതിയേയില്ല,
എവിടെയെങ്കിലും ഇരിക്കണം, ഒറ്റക്ക്….
ആകാശത്തൊരു കറുത്ത പൊട്ട്,
ഒരു കിളി
ഒരു കഴുകൻ
ഒരു വിമാനം
ഒളിച്ചിട്ടും കണ്ടുപിടിച്ച്
അതെന്റെ തലയിലൂടെ പറന്നു നടക്കുന്നു.