സുഖമെന്നതിനെന്തൊരര്‍ത്ഥ,മഴലിന്‍
കുറവെന്നു വരുന്നതെങ്കിലതുപോല്‍
വ്യഥയെന്നതിനെന്റെ ജീവഗതിയില്‍
ഒരു ശൂന്യതയെന്നുമര്‍ത്ഥമെഴുതാം.
പ്രിയമെന്റെ കിനാക്കള്‍ കൊണ്ടു ചുമലിന്‍
കുനിവേറിയതെങ്കിലെന്തു, സഫലം
ഇഹജീവിത,മൊന്നതിന്നു തെളിവായ്
മമ കാമിനി തന്റെ പ്രേമകഥനം.
മൊഴി കൊണ്ടു കവര്‍ന്നൊരെന്റെ മനസ്സിന്‍
പടിവാതിലടച്ചു പാതി വഴിയില്‍,
ക്ഷണമിങ്ങു വരുന്നതിന്നുമളവായ്
ഇമ കൊണ്ടു പറഞ്ഞതെന്തു സഖി നീ.
അറിയില്ല, പവിത്രമെന്നു പതിവായ്
ഉരുവിട്ടു പഠിച്ചു നമ്മള്‍ പലനാള്‍,
ഇനിയെന്തു പറഞിടേണ്ടു പ്രണയം
പല തുണ്ടുകളാര്‍ന്നൊരേടു സമമായ്.
പുതുസ്വപ്നമിയന്നു, നീയുമഴകില്‍
സുമതല്പമൊരുക്കി നൂനമവനായ്
അഭിശപ്തമിതെന്റെ സാധുഗതിയാല്‍
ശുഭമത്രെ നിനക്കു ഭാവി ഗതികള്‍.
സഖി, നിന്റെ മനസ്സിലേവമഴലിന്‍
വഴിയോര്‍ക്കുകിലീ സരിത്തു നിറയും
പ്രണയാര്‍ത്ഥികള്‍, ഞാനുമേകനവരില്‍
പഴിവാക്കുകളോതിടല്ലെ സദയം.
അനുവാസരമേറിടുന്ന നിനവില്‍
മിഴിവാര്‍ക്കുകിലും, മനസ്സിലുണരും
പ്രിയകാമിനി നീയെനിക്കു മിഴിവില്‍
വെളിവാക്കുക പ്രേമമെന്ന ഫലിതം.
No comments:
Post a Comment