ഓര്‍ക്കുക തോട്ടക്കാരാ
നമുക്കു മെനയുവാന്‍
കോട്ടകളില്ല,സര്‍വ്വം
മുടിച്ചു കളഞ്ഞിതേ.
അന്നൊരു നാളില്‍
കണ്ണന്‍ചിരട്ടയാല്‍
നമ്മളിങ്ങൊരുക്കിയ
സുന്ദരമൊരു ഗേഹം.
കേവല,മോലച്ചീന്തു
കൊണ്ടു നാം മെനഞ്ഞൊരാ
മോഹന സ്വപ്നങ്ങളേ
നിങ്ങള്‍ക്കുമിനി വിട.
ഇന്നു നാം മണല്‍ത്തരി
പെറുക്കി വിറ്റും, ചെളി-
ത്തണ്ണീരില്‍ തെളിഞ്ഞീടും
മുഖത്തിന്‍ വില കൊണ്ടും
കേവലവിജ്ഞാനത്തില്‍
ഭാവന കലര്‍ത്തിയും
ജീവനെ പണിയുവാ-
നാവതു ചെയ്തീടുന്നു.
നല്‍ചിലമ്പൊലിയല്ല
ചങ്ങല കിലുക്കങ്ങ-
ളിച്ചെറു ദൂരം വൃഥാ
മുടന്തി നട കൊണ്ടു.
എങ്ങിനെ പണിഞ്ഞീടും
നദികള്‍, കടലുകള്‍
പില്പാടു കാടും മേടും
പുതിയൊരാകാശങ്ങള്‍
ഇല്ലിനിയില്ലാ,നവ-
ജ്ജീവിതം, നമുക്കിനി
ഉള്ളതു മടങ്ങുവാന്‍
ആറടി മണ്ണു മാത്രം.
ഭൂമി എന്ന തോട്ടത്തിന്റെ കാവല്ക്കാരനാണ് മനുഷ്യന് എന്ന അര്ത്ഥത്തിലാണ് തോട്ടക്കാരന് എന്ന പദം ഉപയോഗിച്ചിരിക്കുന്നത്.
ReplyDelete