വിമാനം

നീ വിമാനത്തിൽ കയറിയിട്ടുണ്ടോ?
ഞാൻ ആദ്യമായി കയറിയ ഓർമ്മ
എന്റെ കണ്മുന്നിലിന്നും ഉണ്ട്
എന്തൊരു ആവേശവും സന്തോഷവും
ആയിരുന്നു അന്ന്.
നീ വിശ്വസിക്കുമോ ആവോ
ഞാൻ അന്നു മേഘങ്ങളെ കോരിയെടുത്തു
നക്ഷത്രങ്ങളെ ചുംബിച്ചു
അന്നു ഞാൻ ആകാശത്തിലൂടെ
പറന്നു.

നീ വിമാനത്തിൽ കയറിയിട്ടില്ലല്ലോ, ഭാഗ്യം.
എനിക്കിപ്പോൾ അതൊരു ഭയമാണ്.
എന്റെ ശവവും കൊണ്ടുപോവുന്ന ഒരു വിമാനം
ഞാൻ സ്വപ്നം കണ്ടു,
ഞാൻ മേഘങ്ങളെ കണ്ടില്ല,
നക്ഷത്രങ്ങളെ കണ്ടില്ല,
ഒന്നും കണ്ടില്ല…അറിഞ്ഞില്ല…
എനിക്കിപ്പോൾ പറക്കാൻ കൊതിയേയില്ല,
എവിടെയെങ്കിലും ഇരിക്കണം, ഒറ്റക്ക്….
ആകാശത്തൊരു കറുത്ത പൊട്ട്,
ഒരു കിളി
ഒരു കഴുകൻ
ഒരു വിമാനം
ഒളിച്ചിട്ടും കണ്ടുപിടിച്ച്
അതെന്റെ തലയിലൂടെ പറന്നു നടക്കുന്നു.