നീ വിമാനത്തിൽ കയറിയിട്ടുണ്ടോ?
ഞാൻ ആദ്യമായി കയറിയ ഓർമ്മ
എന്റെ കണ്മുന്നിലിന്നും ഉണ്ട്
എന്തൊരു ആവേശവും സന്തോഷവും
ആയിരുന്നു അന്ന്.
നീ വിശ്വസിക്കുമോ ആവോ
ഞാൻ അന്നു മേഘങ്ങളെ കോരിയെടുത്തു
നക്ഷത്രങ്ങളെ ചുംബിച്ചു
അന്നു ഞാൻ ആകാശത്തിലൂടെ
പറന്നു.
നീ വിമാനത്തിൽ കയറിയിട്ടില്ലല്ലോ, ഭാഗ്യം.
എനിക്കിപ്പോൾ അതൊരു ഭയമാണ്.
എന്റെ ശവവും കൊണ്ടുപോവുന്ന ഒരു വിമാനം
ഞാൻ സ്വപ്നം കണ്ടു,
ഞാൻ മേഘങ്ങളെ കണ്ടില്ല,
നക്ഷത്രങ്ങളെ കണ്ടില്ല,
ഒന്നും കണ്ടില്ല…അറിഞ്ഞില്ല…
എനിക്കിപ്പോൾ പറക്കാൻ കൊതിയേയില്ല,
എവിടെയെങ്കിലും ഇരിക്കണം, ഒറ്റക്ക്….
ആകാശത്തൊരു കറുത്ത പൊട്ട്,
ഒരു കിളി
ഒരു കഴുകൻ
ഒരു വിമാനം
ഒളിച്ചിട്ടും കണ്ടുപിടിച്ച്
അതെന്റെ തലയിലൂടെ പറന്നു നടക്കുന്നു.
'' ഒളിച്ചു വെക്കുന്നു നിന്നെയെന്നാത്മാവില് നി-
ന്നൊലിച്ചിറങ്ങും കാവ്യമിതിലെയാനന്ദമായ് "
Sunday, November 13, 2011
Monday, October 17, 2011
ഓർമ്മ
ഇനിയൊരിക്കൽ പറന്നുപോകാനൊരീ
വഴികൾ ഓർമ്മയിലുണ്ടായിരിക്കണം
പുഴകൾ വറ്റും, കൊഴിഞ്ഞു കാലത്തിന്റെ
ഇലകൾ മണ്ണോടലിഞ്ഞു മണ്ണായിടും
തിരയുവാനാരുമില്ല മുഖങ്ങളിൽ
ചിതലു
ചേരും, ചിരി വാർന്നു പോയിടും
വെറുതെയെന്നാലുമന്നു വാനത്തിന്റെ
വഴിയിലെന്നോ വരഞ്ഞിട്ട ഭിത്തിയിൽ
മറവി മൌനം കടഞ്ഞു കണ്ണീരിന്റെ
കടുമുറിപ്പാടിനർത്ഥം തിരഞ്ഞിടും
തിരികെയില്ലാത്ത കാലം കടന്നേതു
തുറമുഖം, ദൂര തീരം തിരക്കിലും
പുറകിലെന്നോ മറന്നിട്ട മായ്ക്കുവാ-
നരുതാ, വറ്റാത്ത വാക്കൊന്നെടുക്കുവാൻ
ഇനിയൊരിക്കൽ പറന്നുപോകാനൊരീ
വഴികൾ ഓർമ്മയിലുണ്ടായിരിക്കണം.
Monday, June 27, 2011
Saturday, March 5, 2011
Subscribe to:
Posts (Atom)